Oté

Akoz pa in sinp réspé pou la démokrasi

Justin / 19 avril 2018

JPEG - 43.6 ko

Mi pans zot la lir konm moin dann zournal in l’artik dsi bann z’APE-zakor pou in parténarya ékonomik,-dsi in kozman nou la antann dann in sobatkoz dsi la loi La Rényon départman fransé. In moun la di sa la pa in n’afèr pou fé pèr anou pars sa sé in n’afèr va bien aranj anou.

An répons Elie Hoarau, lo prézidan nout parti, la parl filyèr zognon isi shé nou. Dsi uit mil tone zognon konsomé, koméla nout kota d’prodiksyon sé solman sink san tone. Sé dir si konm in pé i di, ni pé tir nout zéping dann zé. Afors tir nout zéping konmsa inn sé kat matin nou va gard shakinn in pyé zognon dann nout jardin kansréti pou konète ankor koman i lé.

Zot va dir amoin fé in fèrm pédagojik avèk bann zéshantiyon zépis dodan i pé z’ète in bon n’afèr mé la pa la dan nou va okip nout min d’èv, la pa la dsi nou va kont pou dévlop nout l’anploi. Nou la pankor ariv la mé i fo pa di sa i ariv ar pa zamé.

An touléka, pou moin sé an plis in sinp késtyonn démokrasi : i pé pa pran bann loi i konsèrn amoin san domann amoin mon l’opinyon, san k’mi koné kosa i atann amoin é koman mi pé prézèrv amoin. Elie Hoarau étan dépité éropéin la signal lo komisèr l’érop épi la di ali sa la pa in n’afèr normal mé i paré lo boug té i s’anfoutsa. Aprésa étone azot si l’érop na poin in gran popilarité an parmi l’moun.

Lé vré i fo pa ni lèss anou fèr é ni grongn an dsou. Lé vré ni pé pa baz dsi sibvansyon pou anpèsh nout lékonomi alé o mouroir. Mé konm i di pou la politès la démokrasi lé né avan nou é sé anou d’réspèk ali é fé réspèkt ali.

NB - I paré ‘d’apré sak moin la antann, pou fé uit mil tone