Lé vré la Rényon antouléka dsi son litoral lé pa in péi d’féfré mèm kan la shalèr i shal ni koné lé pa intéréssan alé fé l’éspor. Sirtou ké plizanpliss ni bate bann rokor la shalèr é lé pa fini d’apré sak mi kroi.

Astèr sré bon ni profite in pé léspèryanss banna i fé dann d’ote péi. Ni koné laba dann l’Almagn néna in ferien-hitze — in vakanss shalèr si zot i vé — na poin lékol kan solèye i poik !. Akoz pa ? Nou sré tayé pou fé kuir anou dann solèye. Mi panss pa !

Mwin mi rapèl kan téi fé trésho lo kor i mète an somèye kissoi pou léspor, kissoi pou lé z’ote matyèr. Tanka ban proféssèr l’EPS — déssèrtin d’apré sak mi rapèl — souvan défoi zot téi apiye pyé mang dann milyé la kour. Normal.. Nou lé imin kant mèm la di.

Astèr sa i poz konm touzour lo problèm lo lané skolèr pars li lé pa adapté pou noute klima. Sa i poz la késtyon la klimatizassion par lo solèye sansa par la mèr.

Anfin in takon problèm bann zanségnan, bann jenn, bann paran épi bann pèrsonèl lédikassion nassional i koné bien.

A bon antandèr salu !

Justin