Si mi domann demoun déza in sèrtin laz, kèl bann zé zot téi zoué étan marmaye. Kisoi dann la kour lékol, kisoi dann vakans dsi la tèr damé la kour, kisoi l’égliz avan katéshis I komans ? Moin lé près sir zot va di… Ofète kosa zot va di ? An promyé, an dézyèm, an troizyèm ? Moin pou mon par, oplis mi tap dési mon klavyé oplis bann zimaz lontan i romont ziska la sirfas. Si zot i lir sak moin l’apré ékri, moin lé sir zot osi zot lé angazé dann in zimnastik la tète, zimnastik la mémoir.

Kosa nou téi zoué kan la koup kann i komans ? La roulète si mi tronp pa. Kosa zot téi zoué kan flanboyan i pète an flèr ? In zanr batay pti kroshé flèr flanboyan. Mé kan nou lété la sézon létchi ? Nou téi fé toupiy avèk grin létchi. Nou téi zoué trou galman, kisoi zasyète kasé, kisoi bouton, kisoi kanète. Lé ga, ékout in pé dann z’ot tète zot va antann si lo règlomann zé i arvien pa dann z’ot mémoir. Alé zot i pé résite dann z’ot tète. Zot i koné kasé, zot i koné bréné, épi tout so bann z ‘afèr lé intérésan.

Garson té i zoué la boul o kan.fiy la marèi. Inn konm lot téi fé tikaz. E toupi alor ? Zot i rapèl kite, sènn, kite, sènn, amenn o ron. Fé roul toupi dsi la lignm, gosh – droit, droite-gosh. Zot téi shanj naye sansa non ? Zot téi mète lo toupi tète an ba sansa non ? Zot té i zoué sèrk kant mèm, kisoi gran sèrk kisoi pti.- mi pans pa zot té i zoué la rou loto pars sa lété rar konm korn lapin sa.

Pli saz, zot i rapèl lo zé daye-daryon ? Mi pans oui mé koméla zot i zoué pi sa. Zot i rapèl lo zé sote la kord ? Sa in zé fiy mé garson osi téi zoué sa ! Lo mèr sa i di azot kékshoz kant mèm ? Lou kouri, lou kashyète, pijon vol. Zot té i zoué tienbo lékilib dsi bak zot ? Zot téi tienbo lontan sansa zot téi shap atèr an vitèss ? Zot i rapèl kan garson barbin téi rès do bout dsi son bèf an lékilib ? Zot té i rapèl ankor zoué balon fotball kisoi avèk la boul an papyé, kisoi la pans koshon ranbouré. Zot i an souvienn sa ?

Astèr ékout zistoir dann la nuite plène line ? Sa i di azot in n’afèr sa ? Zistoir tijan, zistoir grandyab, zistoir lyèv, torti, zistoir sinz, zistoir lo mor vivan, zistoir fantome. Tanpir si i di pa zot arien mé tanmyé si sa i di azot kékshoz. Lé ga, kansa ni fé konm in zézolinpik tout bann zé la. Si ni gingn pa médaye, lor, larzan, ni pé kant mèm gingn médaye an chokola é sa la pa lo pli mal gouté k’néna.