Oté

Akoz pa isi shé nou ?… Kan nou sar fine trap lo tan nout résponsabilité

Justin / 28 out 2018

JPEG - 43.6 ko

Figir azot, so matin, kan mi fé mon vizit dsi mon mésazri. Kosa mi oi ? La pa promyé foi mi oi sa, mé a pti léshèl : kosa i pé fé avèk boutèye plastik ? In bonpé zafèr zot i koné bien… Moin la déza ansèrv sa pou fé pous lo gri frui avèk o grin légime é mèm moin la vi, dann dézèr bann z’asosyasion i fé lo mir pou protèz bann demoun bann péi pèrdi ?.. Kan mi gard dsi l’internet mi oi par isi i di : ala dis manyèr ansèrv bann boutèye plastik, apré ou i oi kinz manyèr, émèm plis.

Mé kosa mon bann kamarad la anvoye pou moin ? In tik-tak i fé laba dann l’ind. Demoun i sava kolèkt bann boutèye plastik. Aprésa zot i moud avèk in mashine gouvèrnman l donn azot é kan lé bien moulé, zot i sava amenn sa pou bann l’antropriz i fé la rout. I paré la fine fé plis trant kilomète la rout konmsa épi bien rézistan o fé fré, konm o fé sho, in karapas pou anpèsh la mouson détrui la rout.

Zot i koné : boutèye plastik sa i mank pa in pé partou dann la natir. Dann loséan néna ziska inn-dé kontinan plastik l’apré détrui bann zanimo la mèr. In pé i ésèye nétoiye la mèr mé ziska zordi sa lé pa tro éfikas mé si i sava kolèkt sa pou fé batiman, pou fé klotir, pou fé la rout é d’ot shoz ankor, ala in spès salté d’déshé i pé ansèrv anou épi tout l’imanité bien konm ki fo.

Astèr nou ? Kosa ni fé nou ? Boutèye i mank pa nou ! ALor, kosa ni atann ? Mi ozré pa dir kan mi antan bann boutèye plastik kraké in pé partou dann lotisman kisoi dann la mindemoun, kisoi dsou la shéniy bann z’anjin, mi pans dann mon kèr nou l’apré détrui la rishès. Poitan sé sa ! Sé sa é lé pa otroman k’sa ! Mi ral pal o kèr, mé mi oi ayèr i fé dé shoz i pouré bien z’ète itil shé nou… Inn foi nou sar fine trap lo tan nout résponsabilité.

NB in pti rapèl kant mèm : kan Paul Vergès lété kandida zéléksyon réjyonal li téi di partou li va ankouraz fé bann pti linité pou trète bann déshé, kisoi plastik, kisoi karton, kisoi pou fé fimyé é d’ot é d’ot, é lo konsèye nora ède bann moun i vé fé sa. In vizyonèr konm i di souvan dé foi mé sa lé pli préférab in ass demoun i oi pa klèr.