Minis lintérièr i sort fé konète lo shif bann madam lé mor afors gingn lo kou avèk z’ot bononm : nana plis troi madam i pèrd la vi shak somèn ! Pli pir, lo shif la goumant ankor. Épi, sa sé lo shif anonsé ! An vré, konbien nana ? I konétra pa... Moin la pankor lir lo shif pou La Rénion, mé lé riskab ète pli mové k’sèt la Frans, vik tape bann madam, sa in mové tradision isi. Nout tout i koné inn, dé, troi... dis fam batu anparmi bann ti-kolon, konm anparmi demoun la Ote.

Bien sir, in pé va di akoz i anparl in n’afèr konmsa ? Akoz i bate tanbour la-dsi ? Avèk la kantité problèm demoun nana... Lé vré, demoun nana bonpé problèm ! Kissa va di lo kontrèr ? Mé sa la pa in rézon pou bann madam pass lo martir dann z’ot mézon, sa la pa in rézon pou k’i bate azot konm i bate linz déssi rosh-a-lavé ! La Rénion i di k’i koriz ! Mé kissa la donn lo droi bann bonom "koriz" bann madam ? Akoz zot i komans pa koriz azot an promié ?
Si gouvèrnman nana in plan, mi pans plan-la lé pa bon vi son rézilta... Si konsèy zénéral i okipe dé sa, mi pans li okip pa bien. Si sé in maladi dan la sosiété, kossa i fé pou guéri la sosiété ? Kansa in plan, in vré plan pou diminié sa ? Sa sé in ont pou in péi !
A, ni vé léksélans ! Bin alor, akoz pa léksélans ossi, la-dan, pou nout ti patri ?

Justin