Mézami mwin na pwin lo shif a soir-la, mé sirman sa i roprézante dé milyon d’mète kube dolo, shak ané, dopi lo zour la rouvèr l’izine éléktrik la rivyèr d’lèst. Dé milyon d’mète kib dolo alé oir lo sé in bien i fo jère sa an bon père d’famiye.Promyé lidé i vien dann mon tète sé : « Pou kossa la désside jète dolo dann Por Sinte-Rose,é la mèm pa rode in solissyon pou pou ékonomiz lo gran lo la. »

Mézami l’est la pwin pliss dolo k’i anfo é souvan défoi kan néna la séshrèss lé défandi aroz jardin, lav loto, ranpli la piscine étsétéri-étsétéra la ké lo ra. Alor la pwin lontan Virapoullé l’avé panss vande so lo-la bande prinss zarab :rozman la pa marshé pars sansa lo boug n oré kalkil toute son bande mové kou na dé shanss réissir.

D’ote moune l’avé panss ansèrv gran lo-la pou demoune dan l’est « épi dan le nor an dévlopan in riv yèr soumarine-inn bone idé sa lé sir.

Mèm momandoné in pé la mazine dévlope léstréssité osmotik k’i zoué dsu l’ékar dann la salinité rante lo d’mèr épi l’o d’riv yèr. Espérimantal zot va dir ! Mé i fo touzour pass par léspèryanss pou ariv a fèr in aplikassion normal , abityèl. Dizon ké laba dann La norvèj lé shoz la fine bien avanssé.Donk akoz pa léstréssité osmotik ?

Sré myé k’so gran –lo la aprèkoul avèk gran fraka, pars demoune inkon sékan la désside fé sak demoune la fé dann lo por sint-roz.

A bon ékoutèr-salu !