Mé kossa bann moun-la épi bann mafaté zot mèm,kossa zot i manz. Sak i produi sir plass ? Kont pa dsi pars néna prèss pi d’plantasyon dann sirk-la. Alor kossa i manz ? Sirman sa k i vann dann grann sirfass issi an ba é sof mon réspé la pa bann produi bon kalité. La pa moin k’i di..Moin la lir sa dann in piblikasyon lo park Nasyonal pars Mafate i fé parti lo park nasyonal konm zot i koné.
Mé alor, pou kossa na prèss pi plantasyon dann mafate ? Sinploman pars lé pli sir gingn in moné dann touris ké dann l’agrikiltir épi plantasyon la dékliné, dékliné, ziska k’in zour lo sirk la parète in pé konm in dézèr.. Domaz, pars gouvèrné sé prévoir é nora été myé prévoir plito ké lèss lé shoz dékaniyé konm zot la dékaniyé. Arzout èk sa, zot i koné touris la, li pé pa ranplas lékonomi in péi, in réjyon, in kartyé. Pou moin lékonomi touris, li lé artifisyèl é tout zafèr artifisyèl kan i gingn in kou d’kongn i rèss atèr.
I doizète lo ka koméla avèk lo kovid .Moin la pa parti oir, mé mi pans i doizète konmsa.
Mézami, mi di azot sa pars mi sort lir sak i pé z’ète in bon nouvèl pou l’agrikiltir dann Mafate. Park nasyonal d’apré sak i di la lans in plan :sa i apèl « Planté pou manzé » dann Mafate, in prozé alimantèr . An prinsip bann zétid épi bann zésé la du komans l’ané 2019 é d’apré sak i di i sava pa mète san sète an pou rovèrdi lo sirk Mafate avèk dé bone shoz é sirtou dann la proksimité.
Planté pou manzé dann Mafate pars la tèr lé an frish ? Inn bone shoz. Mé planté pou manzé dann tout frish néna la Rényon, pliss sète mil éktar, sa lé bon ossi. Bon pou la boush, bon pou lo kor, bon pou l’anploi é bon si ni vé pa dor nout boujaron vid kan v’ariv in pli gran dévène ankor ké lo kovid l’ariv sète ané.