Mé zami, isi La Rényon, nou la konète bann vré malfézan dopi in bon koup de tan é moin néna la krintiv sa la pankor fini in n’afèr konmsa. Pou kosa mi di sa ? Mi di sa pars nout listoir mèm si èl lé kourt, èl lé ranpli avèk demoun malfézan.
Moin lé sirésèrtin firamézir zot i lir bann fraz moin l’apré ékrir, i rapèl azot kékshoz malfézan, kékshoz mové pou nou isi avèk anpliskésa, in bann moun malfézan dann in sistèm malfézan.

Moin lé sirésèrtin, néna in pé i doi di, sé in n’afèr la pi d’aktyalité. Sa té vré dann tan lontan. Mé pou zot sa sé in n’afèr i marsh pi koméla. Mé alon oir in pé pli pré lé shoz :
- Néna isi La Rényon in moun i apèl Didier Robert. Zot lé kant mèm o kouran lo dézord li la mète dann finans la komine Tampon ébin sa l a pa anpèsh la roprézantasyon nasyonal avèk in prézidanLa Répiblik an tète, fé lo forsing pou mète ali prézidan La Réjyon épi donna li kart blansh pou fé son mové tour.
Aprésa, konm li l’avé pa asé mal azi, gouvèrnman droit konm gosh-é ziska bann zotorité éropéène - la fé lo nésésèr pou pèrmète ali lans in rout an mèr san fé lo bann kontrol k’i fé normalman pou oir si lo bann finans lé asé solid, pou oir si lé kondisyon k’i fo lé réini, é pou oir ankor si lo bann ménas dési l’anvironeman lété vré sansa lété pa.

Ala in mové prozé, lansé par demoun inkonpétan épi malfézan, avèk in mank de kontrol, épi i fo dir galman dann in sistèm mové par natir.. Mé zami, zordi moin téi pass dsi la rout litoral é moin téi rogard lo katédral kasé banna l’apré fé é an domandan amoin si dann mon tan vivan mi alé oir sansa non la rout pran lo fon. Sansa si mé zanfan i doi oir sa. Sansa ankor mon bann ti zanfan, mé sak moin lé sir, po pran lo fon sa va pran lo fon.
La pa moin tousèl i pans konmsa ! Fransh vérité, moin la pa tousèl pou pans konmsa !