Donk so kou issi wala ké l’Insee i fé son lankète é ni apèrssoi néna touzour in kantité pôv shé nou, mèm in kantité d’moune mizèr é ké — final de konte — na poin dopi dé zané é dé zané in shanjman kalitatif. Zoué dsi bann nianss sé pou défor la vréité d’apré mwin.

Lé fassil pou konprande bann rényoné lé pa satisfé d’in sityassion konmsa sirtou kan ni koné kossa la sossyété i ofèr bann pov in l’assistans pou rèst mizèr, osinonsa in dépar pou la Franss pou rotrouv laba lo batayon travayèr pov. Sak ni yèmré sé in solission épi in bon solission pa konm sak gouvèrnman i ofèr anou.

An plisské sa, an parmi nou rényoné, néna d’moune i panss la kantité d’moune i viv avèk bann z’avantaz sossio, an finn konte, sé in bann profitèr dann lo sistème. Mi koné pa zot, mé mwin sa i fé amwin in n’afèr kan mi antan :

Néna travaye mé néna bonpé paréssé ! I fé zanfan pou gingn zalokassion ! I okipe mèm pa son bann pti valal. Domaz nou mèm — antouléka — in bonpé d’moune i di épi i aksèpe k’i di dé shoz konmsa. Pars an pliss bann fo parol konmsa sa lé difizé a longuèr d’tan.

Mi arète ter-la mé mi oi ankor in kou i sava kozé : kozé oui, mé fèr kanssa ?

A bon antandèr salu !

Justin