Zot i koné in filozof fransé té i apèl Montesquieu. Zot i koné li té partizan partaz bann pouvoir. Solon li, l’avé troi pouvoir inportan : lo pouvoir égzékitif, lo pouvoir lézislatif épi lo pouvoir zidisyèr. Pars pou li, mèt tout pouvoir dann in sèl min, konm sèt in roi, la pa in bon solisyon. Ni pé koz la dsi in bonpé, mé nou la poin l’tan. Zot i konpran amoin !
Dan troi-kat moi, nana z’éléksyon inportan pou lo péi : z’éléksyon prézidan la Répiblik, donk in gro bout lo pouvoir égzékitif, z’éléksyon dépité, donk in gro morso lo pouvoir lézislatif. Pou pouvoir zidisyèr, na poin z’éléksyon, vi k’dan la France, i vot pa pou mèt bann ziz anlèr. Zot i oi kant mèm, sa sé in n’afèr séryé, é zot i konpran nou lé angajé dann in batay i fo pa ni pèrd.
Alor koman i fo ni fé é kèl bi ni viz ? Dann promyé z’éléksyon, sanm pou moin, sak i fo fèr, sé bat Sarkozy a-tèr é mèt in moun la gosh anlèr. Si posib in kandida lé vréman dan la gosh épi i aksèp in bon program pou nou, mèm in program nou mèm noré fé, dann nout l’intéré. Program Parti kominis i propoz, bien antandi.
Pou lo dézyèm z’éléksyon, si lé vré nout parti i prézant son bann méyèr kandida, sé banna i fo ni sèy mèt an plas. Touléka, promyé tour, i fo ni vot pou zot ; Dézyèm tour, nou va oir apré ! Ala koman mi oi lé shoz.

Justin