Mé toudinkou mi panss in nafèr. Zot i koné dann tan l’avé poin in ta avèk in paké linfirmyé-l’infirmyèz dann péi é pou konpanssé demoune bone volonté téi fé lo néssèssèr pou ranpli in mission d’sèrviss piblik konmsa… Mon papa téi vé pa fé sa li, mé in zour li la gingn in pikir pou fé son koshon : in pikir doktèr l’avé doné é bane bone volonté téi vé pa fèr pars d’apré mwin zot nora bèss an grade.

Donk mon papa la domande son fidèl an parmi lé pli fidèle, méssyé Toto pou ède ali. Donk mon papa avèk méssyé Toto té apré karèss lo gro koshon tèl fasson li dor in pé é piouk, i mète ali lo pikir. Sé sak la s’passé — mission akonpli é inn-dé zour apré lo koshon l’avé rotrouv l’apéti. Mé dann tou bien néna in mal é réssiptrokman… Dsu lé z’antrofète Ariste in dalon mon papa té apré shèrch in moune pou fé pikir son madam é bien antandi li la fé k’pass koté park koshon é li la pa pèrde inn myète sak li la vi.

Donk apré la pikir, li la di : « Féliss, mi oi wi fé bien pikir ». Féliss la réponde : « Pik in zanimo lé fassil mé d’moune mi vé pa piké pars mwin la pèr mi gingn pa fèr ». Ariste la roprande : « Féliss lé pa sèryé, pik in zanimo é pik in moune sé topète morète wi vé pa rande sèrviss in kamarade ? Wi vé pa bande fanm la droite i malpike mon madam é in anvoye ali koté wi rovien pa… »

Inpossib dir non é dopi soir-la mon papa la dovni linfirmyé pou demoune Boi d’Nèf é kan li la kite l’androi Toto la ranplass ali. Lo tan la passé é Toto ossi la parti mé mi vé rande omaze demoune konmsa la si tèlman rande sèrviss demoune… Fèr sak zot la fé mi pans pa k’in zour mi pé fé galman. Mé kissa k’i koné ? Dé foi la vi i mète aou o pyé di mir.

A bon antandèr salu !

Justin