Oté

Ala kosa i ariv kan ou lé pa fèrm dsi out prinsip ! Kok moulèr rant sou la zèl !

Justin / 18 zwiyé 2019

JPEG - 43.6 ko

Mé syé, médam, la sosyété nou la fine di é rodi zédézil i tard pa pou komansé-si tèlman talèr kan va komansé in pé va kroir la fini !-mé moin lé sir bann gran médya sar la pou dir azot zour apré zour « la grann fète » la komansé. La grann fète ? Dann in sans oui, pars pou prépar sa néna demoun la, konm i di, bien in vésti azot késtyonn lorganizasyon, késtyonn lantrènman, késtyonn l’invéstisman san parlé la kan tité souvnir épi zimaz in pé va ramasé pou anparl in zour.
Bravo pou vréman tout sak la invésti ladan. Pars la pa in mins afèr pou fé… Pa pou bann zaspèrkui, bien antandi.
.
Zaspèrkui ! Kosa mi vé dir par la ? Mi vé parl sak la lèss tou lé zot travaye épi momandoné zot i ariv pou ramass lonèr, pou fé oir azot – i di mèm in pé ladan i sézi lokazyon pou fé zot piblisité . Mi mète pa ladan bann famiy bann konpétitèr pars mi koné zot la antour zot marmaye pou pèrmète ali gingn lo méyèr rézilta posib. Mi mète pa non pli ladan tout bann zorganizatèr, bann téknisien, la plipar d’tan bénévol sansa non, pou sak zot la fé pou mète an marsh in gran mahine konmsa.
Kan mi di zaspèrkui, mi oi plito désèrtin politik pars d’apré sak mi kroi zot l’apré ral kouvèrtir dsi zot é apré majine bann zéléktèr va pans azot lo zour véni… Moin lé a d’mandé kosa zot la fé pou La Rényon. Kosa zot la fé pou mète in pé nout péi anlèr pa arienk zordi mé dopi dé zané é dé zané. Moin lé a d’mandé kosa zot la fé pou tienbo lo rin avèk gouvèrnman fransé épi son bann minis épi bann gouvèrnman la zone loséan indien.

Si zot la fé kékshoz la pa dann bon sans. An touléka sé konmsa mi oi sa. Pou kosa ? Zot i pé dir amoin kosa La Rényon i roprézant dann la Coi ? Zot i pé dir amoin kosa i lé so frans loséan indien mi koné mèm pa ? Zot i pé dir amoin kan épi koman zot la tienbo lo rin avèk é mèm kont tout lé z’ot pou fé oir banna kèl koté brinjèl i sharj.
Ala mon répons é si la pa konm sète zot tanpir pou zot. Pou moin zot la fé konm kok bataye, kok moulèr, kan li mète son tète sou la zèl bann pli for. Kok moulèr, rant sou la zèl !