Oté

Ala la kolère pran mwa ! Inn la kolère pran mwa !

Justin / 12 mars 2021

JPEG - 43.6 ko

Mézami, i ariv pa zot d’ète an kolèr pou kékshoz i fé lé zot ni sho ni fré. I ariv sa pars néna dé shoz i fatig lo tété sèrtin é lé zot lé pa la èk sa. Mwin, sé kan i toush kann ké mwin lé pa kontan ditou.

Afèr ? Pars pou mwin kann sa lé bon pou l’avnir nout péi, sa lé bon pou l’avnir La Rényon. Toush kann sé donn kou d’pyé dann mon zénèss épi dann mon lanfans sé mépriz mon papa sindikaliss plantèr arété son kaz apré in manifèstasyon plantèr. Toush kann sé toush lidantité régnonèz.

Mé pa arienk sa, pars kann sa i pé z’ète in baz pou amenn lindistri dann nout péi é sanm pou mwin sa lé inportan. Si zot la lir zoinal Temoignages zot la sirman lir kékpar ni parl kann épi son sink san produi. Fransh vérité i pé fé in kantité produi avèk kann é pa solman do sik : I f boushon pou ranplass bouchon liège, i fé plastik biodégradab, i fé vèrni, i fé levure, lalilantasyon pou zanimo, arzoute ankor, l’angré vèr, karbiran, kontro plaké, é mi arète l pars la list sré long pou vréman.

Astèr mwin la di néna késhoz i fé monte mon kolèr. Sak i fé monte mon kolèr sé ké toute bann produi ni anparl sa i pé fé in pé dann toute péi sof issi La Rényon… Issi ni ansèrv karnbiran kann pou lans santral boi rouz, mé sa lé paf é La Rén yon, sa lé fé Moris. Alor zot i konpran bien, sa i pé pa rann amwin éré in kékshoz konmsa.

Astèr mi sorte rogard in vidéo. Vidéo-la i anparl bann fime pou anbal bann magazine é sa i fé sobatkoz laba dann La suisse. La post lé pa dakor si i anbal pa bann magazine dann fime plastik pars anbal dann payé lé tro lour, é pa sékirizé pa anbalé lo magazine lé riskab déshiré. Anbal dann plastik pétrol zot i koné sa lé pa biodégradab épi i ansèrv in foi. Fime kann lé méyèr mé si kann la pa bio ébin néna lamonyak épi in bann produi shimik la pa bon pou l’anvironeman.

Lo myé sé fé fime avèk kann bio é sa sa lé possib… Kan mwin lé dsi la route mi oi karo kann i ondil dan lo van. Kann lo plantasyon sink san produi. Oussa ? Partou ! Brésil li ! Kuba li ! Thaïland li ! Vietnam li ! La Chine li ! L’Inde li ! Sof La Rényon oussa i gingn pa fé sa.

Konm pti frère in lansien ségatié morisien i di dann son séga Rozéda, kan mi panss sa :
Ala la kolèr pran mwa ! inn la kolèr pran mwa !