Matant Zélida la ékrir Justin :
Mon shèr nové, mon spès salté,
Mi èmré bien savoir kosa i ansèrv parl toultan la kultur, l’ansègnman, la roshèrch, l’indistri la konésans. Mi domann amoin bien pou kosa i fé sa, si lé vré nout vré problèm sé shomaj, sé lojman, la vi tro shèr, é lo réstan. Zot i pans la kultur-la, sa i ranpli lo vant ? Zot i majine la roshèch-la, sa va bat la mizèr a-tèr, l’ansègnman sa i done bonpé travay demoun, la kultur-la, sa va done demoun la kaz... Akoz i parl pa bann vré problèm épi bann vré solisyon ? Pli pir ankor, kan zot i gaspiy zot tan pou anparl l’anvironman, konm si l’anvironman-la, sa i nouri son om. A moin ke zot na poin bann vré solisyon, épi l’èr-la, zot i profèr ral demoun dann shomin san isu... Va touzour trouv demoun pou mèt l’otèr dsi ! Konm i di dan la lang fransèz, va touzour trouv in bouk-émisèr. Na poin z’afèr pli sinp. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Vi koné, nana bonpé d’moun i koz konm ou, i kalkil parèy ké ou, mé la pa pou sa zot na rézon. Matant ! Lé vré sak ou i di : shomaj sa in vré problèm, lo mank lojman osi, sa in vré problèm. La vi shèr osi, sa in késtyon sèryé. Mé koman ni pé éspèr ansort anou dann trin-la ? Done demoun travay pou zot an avoir in salèr pou zot gingn pèy zot soso, épi pèy zot loiyé, épi fé zoué la konkirans rant bann komèrsan pou ral lo kou d’la vi par an ba ? Biensir ni pé kont dsi travay dan l’administrasion, dsi z’alokasyon, l’arzan vyé moun... mé pa solman. I fo ni kont osi dsi dévlopman nout l’ékonomi : l’agrikiltir, la pèsh, l’indistri, l’ékonomi vèrt, bann TIC. Kont osi dsi sak i marsh bra dsi bra dsou èk dévlopman : l’ékol, l’inivèrsité, la roshèrch, la kapasité pou invanté, la kapasité antrèn demoun dan la prodiksion. Donk, i fo pa done kou d’pyé dann sèrvis piblik, dann sosyal, mé osi dan la kultur, dan l’anvironman, dan l’indistri la konésans... Ala nout shomin pou avansé, sansa nou lé kondané arèst dsi l’bor shomin pou agard lé z’ot pas dovan nou. Tok ! Pran sa pou ou !

 Justin