Mon bann zami, zamiz, mon bann dalone, dalon, zami avèk nout bann sèr épi frèr Shagosien, si moin la désid fé in modékri dsi la késtyon bannzil Shagoss é pi bann sèr épi frèr shagosien sé sinploman pou atir nout l’atansyon dsi in poin prinsipal é sirtou a lèss lo pésimism anklav nout léspri.

Zot i koné la CIJ (kour internasyonal Zistis) La Haye la pran in ziszman pou kondane gouvèrnman GB dsi son fason li la sépar bannzil Shagos par raport l’il Maurice é li la fé par lo mèm okazyon in gran vyolasyon lo droi internasyonal si tèlman lo promyé tribinal lo mond la di ali : ou na poin arien pou fé dann Shagos, i fo ou i kite Maurice zèr lo bannzil la, épi lo pli vite posib.

Promyé poin, édézyèm poin la di zot fason d’fèr avèk bann shagosien, fason zot la vide lo péi par raport son popilasyon natirèl é par dsi lo marshé kalité l’indamnizasyon kout ti kuiyèr-la sa lé inakséptab... An pasan, bravo pou bann shagosien pars sé par zot-moin lé sir é sèrtin - lo tribinal la donn in ziziman sévèr konmsa pou GB.
Astèr in pé l’apré di so l’avi lé solman konsiltatif é lé pa égzékitoir. Ok ! Mé mi domann amoin si zot nora préfèr i done GB réon plito ké Maurice épi bann shagos. Donk oré falu niou lé tris kan la pronons lo zizman olèrk ète kontan konm nou la été kontan.

Si ni arzout avèk sa l’ané 2016 in pé plis bann shagosien téi gingn zot droi pou rotourné si la sityasion GB l’avé pa vir an po d’jak apré la késtyonn Brexit. L’èrla, ni pé dir, lo rotour la mank in foi, li va réisi in n’ot foi kan la rézon va fini par gagné dsi la foli bann gouvèrnman réaksyonèr GB épi US.
Ala pou kosa mi pans avèk in vré dékolonizasyon a vnir épi lo réspé lo droi bann shagosien, pti lanp pti lanp la sityasion va fini par klèrsi. Bon kouraz mon bann sèr é frèr, bon kouraz bann rényoné zami lo pèp shagosien. Bon kouraz galman pou l’il Maurice é pou bann pasifis la GB. Ala pou kosa moin lé optimis dsi la késtyon bannzil Shagos.