Kan moin lété pti marmay, mi rapèl byin, dan la kour l’ékol, bann ti-fiy té i fé danse-rone. N’avé plin kalité, mé inn an parmi mi ansouvyin byin, lété ki apèl "lo pon di nor". L’avé in bal déssi l’pon-la é in pé la parti an frode, san domann l’otorizasyon zot famiy é lo pon la défonsé, in bon pé la noiyé. A la fin, bann marmay, byn kontan téi shante : "Ala s’ké sé, bann zanfan obstiné !". Lo tan la passé, é in mèr Sinni la déside fé in pon plas barachois. Promyé siklone, lo pon la kass an morso é mi ansouvyin in zournal la batiz sa, "lo pon di nor".
Pou kossa mi anparl sa ?
Pars, lo nouvo prézidan Konsèy réjyonal la déside fé in route litoral sis voi. La montagn in koté, k’i ménas fou dann fon, pars èl la fine gingn tro le shok. La mèr l’ote koté k’i ménas avèk son bann roulo, pli-zan-pli gro, pli-zan-pli for par raporte lo réshofman klimatik. Dann milyé tousala, nana in gran pon déssi la mèr, in vyaduk i apèl sa. Mon dyé, ségnèr, mari zozèf, kossa k’lé riskab arivé ? Pétète aryin, pétète kékshoz grav ? Pétète dann pé d’tan, pétète dann in bon boute tan ?
Moin na in dalon i di souvan-défoi, « lo pir lé zamé sir ! ». Oui, mé si lo pir l’arivé... si lo nouvo pon di nor i défons. V’arète aryn k’pou shanté : "Ala s’ké sé, bann zanfan obstiné !".

Justin