In bèf, sa i boir bienn lo si li la soif biensir. Pars si li la pa soif, mi mète aou o défi d’fé boir ali. Mi souvien d’in zistoir k’i fé parti d’lo patrimoine la famiy : i paré k’in zour mon papa, lo shèf konm i di sa, la ésèy fé boir inn an parmi son bann bèf. Flaté li, okin rézilta ! Mète do sèl, li, okin rézilta ! Fons la guèl dann lo li, okin rézilta ! Li la bate in kou d’poin marto dsi lo kote son bèf é sète-la la tonm a jnou é té i rès arienk pou tyé lo pov z’animo. Ankor in zour lo shèf la gingn son konba vinkèr ! Mé la pa pou sa moin la shoizi kozman-la, moin la shoizi sa pars somenn isi sé la rantré l’ékol, é so kozman-la i kol bien avèk l’ékol... Ou i sava la-ba pou aprann ! Nou lé dakor ! Mé pou aprann i fo an avoir l’anvi. So l’anvi-la, par kou d’shans sa lé dan ou ! Si lé pa dan ou, i fo ou i tonm dsi in amontrèr-amontrèz kapab done aou l’anvi aprann, l’anvi anrishi out tète avèk zoli-zoli konésans. Donn l’anvi sé lo pyé d’boi d’vi la pédagoji. Donk, mèrsi pou bann amontrèr lé kapab done l’anvi aprann z’ot bann z’élèv. Zot i mérit z’ot plas koté bon-dyé. Alé ! ni artrouv pli d’van !