Oté

« Alé la pèsh la mèr pou trap lékime »

In kozman pou la rout.

Justin / 13 zwiyé 2019

JPEG - 43.6 ko

Médam, mésyé, la sosyété, si ou i sava la pèsh la mèr, sansa la rivyèr sé pou kosa ? La plipar d’tan ou i sava la pèsh pou gingn in kari poisson. Mé ou i pé galman trap in kari krab, karangèz, krab jiraf. Dann tan la pèsh té pa tro défandi par isi sansa par laba, ou téi pé mèm trap in zourité sansa in morgade. Mé sa té dann tan pars koméla poisson lé rar é sak mi sort site lo nom lé ankor pli rar ké korn lapin. Alor alé la pèsh oui ! Mé alé la pèsh pou pa trap arien ditou, sa la pa inn vi, é sa lé pa fézab é kan ou i rant out mézon ou i pé trap sirman inndé kozman pou fèr mal aou ankor plis. A ! Lé vré lo péshèr néna lorgèye é kan li sar la pèshé li l’apré rode in satisfaksyon é si li gingn pa, si li sava, konm i di la pèsh pou trap lékime son l’amour prop i pran in mové kou. Mé, abien kalkilé, si lé konmsa zordi sé pars sak la vni avan nou la bokou gaspiyé. Alé ! Mi kite azot rofléshi la dsi é ni artrouv pli d’van. Sipétadyé !