Mi souvien, dann premié tan bann fotbalèr rénioné té i sava zoué la koup an Frans, banna té i gingn galo... é, pa pou plézanté siouplé. Té pi in défèt, té in raklé avèk in éskor. Baba ! Vèy pa !
Apré sa, firamézir, bann Rénioné la fé progré. Si té i pèrd, té i pèrd avèk in éskor a pépré normal. Inn-dé foi la gagné, issi la Rénion, konm la-ba dan la Frans. Inn-dé lékip la ziska fé zétinsèl... tansion, la pa gingn la koup ! Mé la pass inn-dé tour an plis, é nou, bann ti-kolon, nou té kontan.

Solman, mi koné pa si zot lé konm moin, kan in lékip la Rénion i zoué avèk in ékip la Frans, moin na touzour la krintiv ni pèrd... mèm si bann zouar la Rénion i antrèn, mèm si zot nana in bon formasion, sansa si nana in pé Rénioné i fé romark azot an bien dann shanpiona la Frans. Mé lé konmsa, in for konplèks linfériorité... le san lésklavaz i bouy ankor dan mon li kor.*

Alor pou Jeanne d’Arc, moin lavé la krintiv, épi moin lavé léspoir. Dé foi mi pans ni sava pèrd, apré mi di : akoz ni gingn ar pa nout tour ? Boudikont, mi di : « Balon lé ron pou tou l’moun ! ». Gingn ou pèrd, mé fé valoir... Épi la Jeanne d’Arc la gagné : inn-zéro ! Lasé sa ! Lé bon konmsa ! Pa bézoin plis ! Zis in bi épi nout bonèr lé asiré ! Estèr, si banna té i gingn alé pli loin ankor ? Pass ankor in tour. Sré valab in ! Alor konm i di dann léspor : « Alé lé mov ! ».

* In shanté morisyen i di sa.

Justin