Afors zot té i èm konm la patat an krème, Tizonm avèk son madam la fini par gaté. Shakènn la parti son koté, la haine dann kèr... Ala madam Tizonm i mor : in zo kabri la mal passé. Mésyé tizonm i sava lantèrman épi li rès dèrnyé dann simitir. Kamarad i sava oir ali. Zot la pèr li trap in fonn’ shagrin. Alé oir, lo boug i di azot : "Aspèr in pé, moin l’apré donn kouraz bann bébète dan la tèr. Mi di azot : Alé lé vèr ! Alé lé vèr !"
Out zistoir i fé pa ri Justin épi dabor inn, toulmoun i koné sa. Moin lé blizé rokonète la vérité. Mé mi di sa, akoz moin lé kontan. Dopi in somèn, lo stad "Geoffroy Guichard" i trap kouran li la bézoin par in lizine aléktrik solèr : banna la mont bann panno fotovoltaïk dsi lo toi bann tribine. Alors, va gingn fé lékonomi lénèrzi épi va évit fane in pé gaz karbonik dann l’èr pandan la koup rigbi.
In pti bien, pou in gran maladi ! Akoz moin la lir par-la, la koup rigbi i sava fane dann l’èr 570.000 tonn gaz karbonik. Alor si moin lé kontan oir an Frans, banna i fé in pé konm nou, mé an pti. Zot i konpran pou kossa moin la pa fyèr oir démonte lanvironnman konm sa.
Alor, alé lé vèr ! Alé lé vèr ! Békali, mon zistoir i fé pa ri !

Justin