Kozman la mi koné sa dopi lontan. Pou moin sa i vé dir in kékshoz konm « alé fé oir aou ! » osinonsa « alé baladé », « désote dann mon kol pinèz ! » konm in manyèr anvoy demoun dsi lé roz. Na poin lontan dann liv Daniel honoré, moin la lir sa i fasonn rabès in moun pou dir ali ou lé sipèryèr ali vi k’lé kapab pèye in barkète pou li. Mi di pa la pa vré, mé mi poz amoin in késtyon : sré pa plito ké ou i di la pèrsone sépa si èl i kroi ou va pèy son manzé-si èl lé si bète pou kroir in n’afèr konmsa.

Biensir lé pou abès la pèrsone, mé sé pa pou propoz aèl fé in zès an sa favèr mèm mové kèr. Touléka sa in kozman i fé travay mon tète, pars mikoné pa kan li lé éné,dann kèl sirkonstans lo promyé moun la di sa é konm mi koné pa, konm i di, so bann paramète-la, moin lé annuiyé pou ansèrv de li dann lo kontèks k’i fo. Alé pa kroir sa i anpèsh amoin dormi ! Dir sa sré mantir !