La plipar d’tan demoune la mète l’aksan dsi lo dézyèm bout : « néna i dékone ». Sa la pa in n’afèr pou étone amwin pars bann voiyèr rish i porte souvan dé foi zot rogar azot dsi bande moune an difikilté épi i di zot i dékone. Pars bann rish i dékone pa zot ! Zot i profite pa zamé z’ot sityasion !. Zot i pèye zot zinpo korèktoman ! Zot i rode pa piston pou zot famiy ! Zot i ésploite pa demoune an difikilté ! Zot néna toute bande bon valèr la moralité ! I trouv pa in sèl délinkan an parmi zot ! Zot i gaspiye pa larzan kansréti pou manz in l’antrekote dékoré avèk la poud do lor ! Donk néna sak i fé lé shoz konm ki fo san pour san é sak i dékone.

Alé marshé don !

Mé dann lo kozman mi yèm galman lo bout i di : « an parmi bande moune dann la difikilté néna i fé bien. ». Donk zot lé kontan dann la difikilté ! zot i fé sak la sossyété i vé zot i fé ! Zot i réspèk la moral la sossyété san pour san !. Méssyé, médame ; la sossyété kissa i pé ésplik amwin koman fèr bien kan ou lé dann la difikilté.? Koman fèr bien konmsa pèrsone i roprosh pa ou arien ?. Koman wi pé z’ète alèz blèz dann la difikilté, dann bande z’anmèrde.

Alé marshé don méssyé lo prézidan !

Kossa wi vé fé kroir kisa ? Ou la fine oir in moune oboute lo roulo !. Ou la fine domande ali koman li fé bien kan li lé dann la mouize ziska lo kou. Akoze wi sava pa domann sa shake pèrsone, issi La Rényon, tout lo troizour i mète la kord sansa i sote o an ba dopi l’pon, sansa sak i gingn dépréssyon par dsi déprésyon. Kan ou i di banna i fé bien wi vé anparl banna ou la ?

Alèz Blèz dann difikilté ? Sa in bob sa ! Alé marshé don !

NB : kozman méssyé Macron : « Les gens en situation de difficulté, on va davantage les responsabiliser car y en a qui font bien et il y en a qui déconnent »