Oté

Alé pa la pèsh la mèr pou trap lékime sorman

Justin / 18 octob 2018

JPEG - 43.6 ko

Moin la antann in zistoir dann radyo. Mi koné pa si lé vré san pour san mé doi an avoir kékshoz vré vi ké plizyèr jenn épi plizyèr paran lété apré s’plind. Splind pou kosa ? Pou in drol zistoir fransh vérité. Mi rakont azot sa konm moin la antann konmsa omoins si zot néna in propozisyon in pé malonète konmsa zot va méfyé : i pran pa po d’shanm pou pla kouvèr !

Ala l’afèr :
I paré in ga la roganiz in voiyaz pou amenn bann jenn fotbalèr dann l’Anglétèr avèk d’apré sak zot i di in promèss fé sign bann jenn dann in klèb zanglé. L’avé par-la in in sinkantène marmaye épi in bann paran pou akonpagné.
Kan l’ariv laba la diviz lo group an troi épi la roganiz bann tournoi fotbal avèk bann ti zanglé. I paré bann zanglé la gingn kadadak, mé kan l’ariv pou rotourn La Rényon, la rotourné mé pèrsone rant bann marmaye la pa gingn kontra.
Donk zordi zot i réklam - a tor, a rézon - mi koné pa ozis. Mé sak mi koné dann tout l’éspor néna trépé i sign pou in klèb profesyonèl. Dsi sinkant pétète téi pé tir inn-dé pa plis é si lo roganizatèr la promète azot plis sé in sharjèr d’lo. Si zot la kroir in n’afèr konmsa zot la mète azot mèm lo doi dann zyé. Antouléka néna in pé paran la anprète larzan pou sa ziska sink sis mil éro.

Mi souvein néna in bon koup de tan moin l’amenn in garson amoin, dann La Frans. Li téi vé fé in karyèr dann zido. Lo diréktèr la di konmsa : dann la sal néna parla san marmaye mé pou finir néna pétète sink va réisi fé in karyèr nasyonal. Sak i vé i pé alé, rotourn shé zot. Moin a di mon garson : « alon ! ». Li la pa vouli mé o final konm la plipar son bann kamarad li la pé fé in karyèr an Frans.
Dann fotbal lé parèy ! Dann tout bann éspor lé parèyé. Sa ni koné. Nout zanfan, ni oi sa for vèye pa koman. Ni oi li avèk lo zyé d’paran, mé kroi pa ousa zot v’alé va agard azot avèk in zyé konmsa… Domaz pou sak lé pri mé konm i di : antansyon alé la pèsh dan la mèr pou trap lékime sorman... Sa i vo pa la pène.