Zot va éskiz amoin si mi arparl ankor in kou l’épizod lo prézidan La Réjyon.
Kèl l’épizod ? Zot i koné li la domann pou vote Fillon pou lo primèr, aprésa konm lo Fillon la di la kolonizasyon sé in partaz kiltir, li la désid vote pou Sarkozy, pou ardomann pou vote pou Fillon lo lindi avan kok té fine shanté é Sarkozy éliminé.

Konm di lo shanté Frans Gal, pétète sé in détaye pou zot, mé pou moin sa i vé dir bokou.
Pou kosa ? Pars mi trouv lo prézidan l’avé in bon réaksyon kan li la rofiz oir la kolonizasyon konm in partaz la kiltir. Pars plito k’in partaz sé in dominasyon, in l’aliénasyon avèk an plis lo bann krime kont l’imanité. Moin té pa loin bate la min pou li, kan li la di li manz pa do pin konmsa… sof ké moin té a d’mandé si l’été pa in zé d’lou kouri diréksyon in viktoir posib.

Astèr ! Astèr ? Mi poz amoin késtyon.
Si mi tronp pa, Didier Robert lé pou l’émansipasyon lo pèp rényoné. Sé minm li ké la di so mo-la an promyé ! Sa in mo i vé dir késhoz sa ! Sa i vé dir, ou i koup lo kordon, ou i vien plizanplis otonome, boudikont ou i rash out libèrté out souvrènté. In minèr émansipé sé in moun i gingn son mazorité l’az sèzan ! In pèp émansipé sé in pèp i rash son souvrènté nasyonal ! Sé dir si sa sé in mo ké lé for. Sé dir sa sé in riptir pou nou !

Mé oila, konm in bonpé kolonizé, sanm pou moin, li kas, li briz, li koz gra, si lo zyé lo mète lé pa la, mé si lo zyé lo mète lé la, sansa si lo mète i ariv a konète… la pi parèye ditou. Li lé pi émansipé ditou !

Mi pé konprann li lé partazé-na in bonpé lé konmsa isi shé nou !-Mé aprésa, kontinyé konmsa épi étone aou si ou i parl l’émansipasyon é lo moun i konfyans pa ou.