Mi souvien in zistoir, mi pans lé vré vi k’moin la bien konète lo moun la fé forfé-la. Pou pa kash la vérité, bononm-la l’avé dé pti marmite kafé an plas son dé poin é mi di azot sa la fé déga dann l’androi moin té i arèst. Mé la pa tousa ! In zour, li sèye fé boir son bèf : li mète do sèl, dolo bien fré, bèf i boir pa. In kolèr i pran ali, li fout in kou d’poin dsi bann kote son bèf, bèf la tonm asiz atèr é aprésa, sèl zafèr k’i rès sé l’abatoir… La pa tousa, sa in provèrb sa ! Dann kèl ka i aplik ali ? In pé partou mé dann la pédagozi li néna son plas. Sa lé sir ! Si in moun i vé pa aprann, koman ou i donn ali l’anvi aprann ? Sa sé in problèm san solisyon la plipar d’tan. Aprann la pa antomatik, l’anvi aprann i koul pa d’sours ! Alé ! Mi kite azot rofléshi la dsi é ni artrouv pli d’van. Sipétadyé !