Mi koné pa si zot la fine romark in n’afèr mé zot i pé fé travaye z’ot mémoir é moin lé sir sé in n’afèr va rovni pli vite li la parti. Kosa i lé ? Sinploman néna troi baro dann désèrtin simityèr tradisyonèl. Sindni lé konmsa ! Donk alé simityèr sé alé troi – baro. Si in moun i anvoye aou la-ba lé konmsi li di aou : « Alé krévé ! », sansa « Alé dann péi vant-an-l’èr ». Si ou i domann in moun ousa i lé é i réponn aou, lo moun la fine ariv troi-baro, la pa bézoin fé in désin pou konprann l’afèr. Pétète lé moin danzérab dir lé shoz konmsa, plito k’anparl lo simityèr li mèm… Zot i koné anou kréol nou la in pé pèr lo roiyome lé mor. San rézon ! biensir, mé la pa pou sa ké out pèr i disparète fasilman. Alé ! Mi lèss azot rofléshi la dsi é ni artrouv pli d’van sipétadyé.