Oté

« Alé vann la sand par pint »

In kozman pou la rout

Justin / 16 févrié 2019

JPEG - 43.6 ko

Mi koné pa si moin la fine anparl de sa avèk zot. Pétèt bien k’oui, pétète bien k’non ! An toulé ka, konm mi koné azot, é konm mi koné zot lé konm i di-féru dsi lo poinn vizé d’la kiltir popilèr rényonèz - moin lé sirésèrtin zot i koné kozman-la é zot i ansèrv tazantan. Pou kosa ? O moins pou k’i tonm pa dan l’oubli !.. Final de kont la pa bézoin ou néna lo bann nérone o top pou konprann kosa kozman-la i vé dir. I vé dir sinploman okip out tan pou pa fé gran soz. Sof ! Mé la sand la pa in kétshoz i ansèrv pa arien. Konbien foi ou i antan : ou la poin l’angré mète la sand dann out plant ou va oir koman li va pousé. Sansa, fourmi ki mord i rann aou la vi dir ? Mète la sand dann out bann po, ou va oir si zot i gingn pa z’ot rès trankil. Nétoiye marmite ? La sand lé bon pou sa. Mèm bross out dan san dantifris, sa lé bon. Alor, si in moun i vann la sand par pinte, mi di pa mi ashètré, mé si li done, moin lé prénèr-dé foi i fo zète in pé pirat non ? Alé ! mi kite azot rofléshi la dsi é ni artrouv pli d’van. Sipétadyé !