Oté

Aleluya !

Pol / 11 mars 2019

JPEG - 43.6 ko

Kisa zordi lé kapab di, lo kantité konférans Paul Vergès la fé, pou koz d’si problèm la Rényon ? Mi kroi pa si néna inn lé kapab réponn sa. Mi poz lo kestyon, mé mwin minm, mi bat aryèr, akoz navé si télman. Mé lo kozman, mi an souvyin, a zot osi mwin lé sir.

Konbyin d’fwa li la di, li la mét an gard : lo systém davan la fé son tan, la fine aryéré, lo shéma la pi bon, i fo invant in not modèl d’sosyété pou nout péy. I fo in rasanblaz politik, zéli tout bor, la rézion, lo départman, bann mér, in rasanblaz zidé, in rasanblaz la popilasyon pou lo dévlopman la Rényon, pou dinité nout pép. An gro, fo bouz ansanm, fo koz lo minm vwa, sinonsa la Rényon lé mor. Zoréy coshon dann marmit pwa ! Akoz sétaki néna malol dann zyé, dot moulal dann koko, mé néna osi inpé i wa sélman zot shapél, zot zintéré, zot bél pla manzé. Mé na pwin ryink sa, néna in takon zésplikasyon ankor…
Mé kanminm sa, dousman, dousman, ti myèt, ti myèt, kozman Paul Vergès, zidé lo Parti, la fé son shomin. Lo bann koko dir, ki vé, ki vé pa, tard pa la pa lwin, i fodra zot i fé a zot méa-culpa. Napi zordi dot solisyon. Konm Paul Vergès té i di souvan : Lé déza tar, mé pétèt pa tro tar.

Lo rézon mon modékri ladsi, sé lo préshman Monsényèr Aubry la fé lo 5 mars, dann in tribine lib. Mwin la touv son kozé té zis, té zoli ziska. Pourtan, Monsényèr lé pa in kominis, mé li lé i in Rényoné i ém son péy. Li minm lavé di in fwa « Oté kréol, pa bézwin la pèr, lèv la tèt, rouv lo zyé... »
Dann son tribine lib, Monsényèr i di lo minm zafér Paul, li presh lo minm propozisyion nout Parti i fé. Sétin rékonfor. Ankor in shoz, lo 5 mars té laniversér Paul Vergès. Aléluya !

Pol