Mésyé, médam, la sosyété : koz avèk moin sé koz èk in kouyon-sé o pyé d’lo mir k’i oi lo mason. Si zot lé konm moin la fine viv in bon koup de tan, si zot la frékant demoun mèm kalité moin la frékanté, ébin, lé sir zot i koné kozman-la. Mi souvien kan moin lété l’armé téi di : « Alèz dann lé brelaz ! ». Brelaz ? Sa lété in bann koméraz an kuir téi garote aou anndan pou port in bann tripotaz soidizan ou l’avé bézoin pou fé sanblan fé la gèr. Mé nout kozman anou, moin lé sir bann moun i yèm vanté téi di sa pars sa i vé dir tout lé fasil, tout lé korèk mé alé oir souvan défoi la pa sa ditou : ou i pans ou lé alèz, mé ou i tonm dann malizé épi ou i rogrète out kozman. In foi, dann bal sal vèrt, in ga lété pi tro tousèl la fé in démonstrasyonn vals apré an avoir di li lété alèz blèz dann dans-la. Li la tourn konm in toupi san naye épi li, lo madam téi tourn avèk li, plis ankor in moun zot l’aral an pasan, la pète atèr é anplis dann la bou. La kass l’anbyans, mi pé dir azot. Alé ! Mi kite azot rofléshi la dsi é ni artrouv pli d’van. Sipétadyé !