Mi sort lir in kozman mésyé Macron é mi doi dir azot kozman-la i déranj amoin in pé,bonpé.Donk li la di dovan l’moun :an parmi bann pèrsone dann la difikilté néna i fé bien, mé néna i dékone in pé. Ala in drol de fraz !Ala in drol de kozman !

La plipar d’tan demoun la mète l’aksan dsi lo dézyèm bout : « néna i dékone ».Sa la pa in n’afèr pou étone amoin pars bann voiyèr rish i port souvan dé foi zot rogar azot dsi bann moun an difikilté épi i di zot i dékone. Pars bann rish i dékone pa zot ! Zot i profite pa zamé z’ot sityasion !.Zot i pèye zot zinpo korèktoman ! Zot i rode pa piston pou zot famiy ! Zot i ésploite pa demoun an difikilté !Zot néna tout bann bon valèr la moralité !I trouv pa in sèl délinkan an parmi zot ! Zot i gaspiye pa larzan kansréti pou manz in l’antrekote dékoré avèk la poud do lor ! Donk néna sak i fé lé shoz konm ki fo san pour san é sak i dékone.

Alé marshé don !

Mé dann lo kozman mi yèm galman lo bout i di : « an parmi bann moun dann la difikilté néna i fé bien. ».Donk zot lé kontan dann la difikilté ! zot i fé sak la sosyété i vé zot i fé ! Zot i réspèk la moral la sosyété san pour san !.Mésyé , médam ; lasosyété kisa i pé ésplik amoin koman fèr bien kan ou lé dann la difikilté. ?Koman fèr bien konmsa pèrsone i roprosh pa ou arien ?.Koman ou i pé z’ète alèz blèz dann la difikilté, dann bann z’annui.

Alé marshé don mésyé lo prézidan !

Kosa ou i vé fé kroir kisa ? Ou la fine oir in moun dann bout roulo ou.Ou la fine domann ali koman li fé bien kan li lé dann bout roulo.Akoz ou i sava pa domann sa shak pèrsone, isi La Rényon, tout lo troizour i mète la kord sansa i sote o an ba dopi l’pon,sansa sak i gingn déprésyon par dsi déprésyon.Kan ou i di banna i fé bien ou i vé parl banna ou la ?

Alèz Blèz dann difikilté ? Sa in bob sa ! Alé marshé mésyé lo prézidan !

NB : kozman mésyé Macron :"Les gens en situation de difficulté, on va davantage les responsabiliser car y en a qui font bien et il y en a qui déconnent"

Justin