M’a dir azot, sa sé in n’afèr moin la fine fé la romark dopi lontan. Lé pli fasil déklar la guèr, ké fé la pé. Mèm dann in famiy, lé pli fasil déklansh bagar plito ké ramenn la trankilité. Mi koné pa si zot lédakor avèk moin, mé nana si tèlman l’ébzanp i sava dann sans-la ké mi pans lé bien difisll donn amoin la démanti… Dann l’aktyalité nana in bonpé péi i soufèr la guèr : kisoi la guèr sivil, kisoi la guèr in péi étranj i déklansh. Konbien gran shèf blan pou in rézon zot i di pa la parti bonbard bann péi étranj konm Malbrouk-s’an va t’an guèr é kan zot té fini bonbardé mèm lo l’éta lété détrui si tèlman k’apré i gingn pi trouv lo bout. Poitan si zot i kalkil bien, dann bann kozman tout nasyon nana bon konsèy, nana bon solisyon, mé in bonpéi tienbo pa kont é zot i s’anfoutsa. La sazès ? La pé ? sékonm in maladi. Alé ! Ni artrouv pli d’van sipétadyé.