Oté

Alo, Dokter ?

Pol / 26 mars 2019

JPEG - 43.6 ko

Koméla, sak zour bon dyé i donn, nou dékouv tout kalité maladi. Ousasa i sort ? Personn i koné pa. Minm lo bann pli gran doktèr, lé anmèrdé souvan, zot i gingn pa réponn a ou konm i fo. Andiré, plik nout sosyété i évolyé – swadisan-plik nou lé malad, plik nou konpran pli aryin.

An parmi tout so bann maladi, askiparé, zordi, lo nouvo fléo, sé in maladi i apél : Légosité (l’égocentrisme). Li lé pa ankor arkoni par la kés séki. Kosasa i lé sa ? An vérité, li dat pa d’yèr, mé li lé dopli zanpli daktyalité. So maladi la, sankiparé, lé grav bonpé pou sak néna. Lo personn i gingn sa, i fé pityé, li souf in shyé. Mé li fé pa war. Pétèt minm, li koné pa. Lo moun malad, néna tandans, an permanans, raminn tout d’si li, pou son prop zintéré. Ali minm lo manitou, lé zot i kont pa. Mé, an vérité, sa i vé dir, li lé an détrès. Ek le « Mwa, je, mwa sési, mwa séla, mon sési, mon séla… sé lo sign d’ in servo soudévlopé , raptisi ».

Malérèzman, so maladi la, i frap zordi, bonpé nout politik. Lo bann zapranti lé ankor pli pir, pli ridikil. Zot i débark, zot i wa pa ot shoz ké zot zonbri. Lé pa ék légosité inn, ék légosité lot, nout péy va avansé, oté ! Kontrèr, lé insinifyan. Sé pa konmsa, ou va géri a ou. In koséy : Alo, Doktèr ?
In bon doktèr, pa mantèr, la di : « In légositèr, sé in moun i ém a li tousél, li siport pa lézot. Dikou, sé ali minm son lénmi , é parlfèt personn i ém pa li osi ». La pa mwin pou vot pou in moun konmsa.

Pol