Mé oila, la kriz la pass par-la é koméla ni produi in tone é sa i fé vréman pa bonpé ; si ni ramenn sa an sirfass la tèr sa i fé mèm pa dis zéktar konte 3000 dann tan kiltir la lété fringan shé Nou.

Koméla si zot i sava dann in salon zot i oi bande pti fyol, dis éro inn é si zot i rogarde bien zot va lir dsu lékaliptus, kriptoméria, épi in varyété produi i apèl uil éssanssyèl épi zot va oir ossi géranium-oui noute jarn iome la fine ariv an ptoi fyol par si par la.

Zot i koné kossa sa i fé panss amwin ? Sa i fé panss amwin kan la dépouye bande zizine sikriyèr pou fé léspozissyon, konm par ébzanp Stella-matutina ;noré pu fèr ossi dann four a sho ;donk ni pass d’in prodikssyon indistriyèl ziska in prodikssyon touristik ; so kou issi an pliss i pé konssidèr sa konm médikaman.

Mé sa i anrishi pa nou. Sa i fé pa viv la famiye,sa i ansèrv ziss pou zoinn lé dé boute avèk lo milyé.. pétète demoune lé kontan, pars sa lé prop, épi i fé d’bien la santé mé antouléka i baz pa la dsi pou fé lékonomi d’in péi.

Alé ! Si zot i vé, kan mi oi lo bande pti fyol mi oi sa konm a rogré pars sa i rapèl amwin lo tan noute lékonomi té in vré lékonomi mé élas so tan-la lé fini ziska k’in zour li rolèv la tète. Pa zordi, pa domin sa v’arivé.

A bon ékoutèr-salu.