Dann son l’interview par Salim Lamrani, Elie Hoareau lo Prézidan lo PCR pou bien amontr nout lisolman é koman sa i afébli anou i déklar :

- dann l’Afrik 55 péi la fé in zone libréshanj é nou nou lé a l’ékar d’sa.

- dann l’Azi bande péi konm la Chine, Zapon, l’autrali la fé galman in zone libr-éshanj mèm ké zot lé pa dakor dsi lo poinvizé politik.

- Loséan indien i sava dovnir in léspass avèk bande zéshanj anparmi lo pli inportan, é nou ?

Pou lo kamarad Elie nou ossi ni doi rante dann bande kouran d’éshanj-la konmsa é ni doi pa rèss a l’ékar. Na poin in propozission pli rézonab ké sa é méyèr pou nou épi pou lé zot. Zordi ni pé pa rante dann trin bande zéshanj-la san domande l’érop siouplé é sé in fasson pou ké ni rèst dann in lékonomi d’kontoir k’i fé anou si tèlman d’mal.

Kan i rogarde in karte nout séktèr sid-ouest loséan indien néna kékshoz k’i di anou avèk fors nout l’avnir va pass san tardé par l’Afrik de l’est, Madagaskar, Sésèl, Bannzil komor. Néna ossi in signal for i di anou domin nou va éshanj avèk l’Inde, l’Iran, la Chine, l’Indonézi épi d’ote péi i fonss an avan an dirékssion zot dévlopman.

Pou mwin si La Franss avèk L’érope i kontinyé izol anou konmsa, sa i sava pa dann sanss noute lintéré anou alé oir La Répiblik Maurice el l’apré kass lizolman, parl pi Madagaskar, épi biento Bannzil komor, Sésèl.

Astèr kan mi panss lé Sésèl, mi kalkil son rolassion avèk la Russie dopi dé zané é dé zané : somenn dèrnyèr La Russie la réini 49 péi l’afrik pou fé lo poin zot rolassion ébin Sésèl téi fé parti so bande péi-la… é nou pandan s’tan la, nou lé toussèl, nou lé izolé é ni avanss pa ziskakan ? Ni oi bien sa sé in n’afèr i tien pa d’boute é si ni plède pou in l’intégrassion dann loséan indien sé pars sa lé indispanssab pou nou.

A bon antandèr, salu !

Justin