Pé sfèr zot va dir amwin sé in lidé dan mwin pars bann zantropriz rényonèz lé pa pèrdan dann lo mouvman ékonomik i amors dopi in bon koupe de tan. Mi souèteré sak i di sa la rézon mé mi oi sé Téréos la pran kann é sé pa bann rényoné.Mi oi galman bann gran komèrs rante lé min bann kapitaliss déor.. Dann lénèrji mi oi l’EDF, mi oi galman Albioma, mi oi d’ote galman mé dann in konkiranss difissil.

Mi oi ossi la SIDR lé pi anou é lapa pou sa ké li marsh myé.Mi antan dir-mi vann konm mwin l’ashté- Téréos i vé shanj son fizi dsi zépol é li vé obliye son lakt néssanss pou li rante dann l’imobilier. Talèr in pyé kann nou na pi é i fo ni fé in mizé pou mète kanndedan pou pa obliyé koman sa i lé, koman sa i pouss, koman i lé tèl varyété tèl varyété…

Astèr zot va dir amwin si bann sossyété kapitaliss i manz zot foi rantre zot kossa sa i fé anou : zot na ka manzé. Mi oi pa lé shoz konmsa. Mi oi pa bann ka^piotaliss déor apré dévlope npoute bann prodikssion la plass bann kapitaliss rényoné, sansa la plass bann rényoné tou kour… Mézamimi panss i fo ni diskite sa sèryézman pou oir koman ni pé dévlope noute lékonomi dann noute lintéré rényoné.

Skiz amwin si mi ropran lo diskour noute parti k’i di sak i fo anou sé in dévlopman par bann rényoné pou bann rényoné. Atanssion li di pa in dévlopman par bann kapitaliss rényoné, mé li di par nou rényoné.

A bon antandèr salu !