Mésyé l’ékoutèr radyo pèrkal,

Moin la bien ékout sak ou laté apré di dsi nout radyo proféré... Si moin la bien konprann out kozman ou lé bandé an trantsis é moin pèrsonèl mi trouv ou la bien rézon.

Kosa i fé ankolèr aou ? Kosa i rann aou bandé an trantsis ?

Sé la goumantasyon la CSG-kontribisyon sosyal generalize. Ou I di avèk zisté rézon lo goumantasyon la CSG i sava fé pèrd aou l’arzan, pou ou épi pou out famiy. 1,7 % : i diré sa lé pa granshoz mé dann la réalité, la pa 1,7 mé 1,8 si tèlman ké lo rotrété i sava pèrd, an plis ké sak li pèrd zordi. Dé sèrtin i sava pèrd ziska 600 € pou in n’ané (sinkant € par moi). An pliské sa néna ankor d’ot kalité prélèvman i sava pa goumanté mé va rès parèye. Tout fason, tout bann zournal I rokoné, pou l’ané 2018 nora in bès rovni dsi sète bann rotrété an zénéral, konm dsi sète bann salaryé.

In vré kalkilatris shinoi-in vré boulyé par l’fète.

Zot i rapèl koman bann vyé shinoi téi kalkil lo pri out bann komisyon dsi son boulyé ? Lo doi té i sava droit a gosh, dépi an o ziska an ba, é dopi an ba ziska an o si tèlman kan la fini ou i koné kosa ou néna pou péyé. Ou té i pèye, sansa ou té i domann mark dsi in karné, mé ou té touzour a d’mandé si dann son zé d’min, zé d’vilin li la pa roul aou kansréti in pti pé dann la farine… Gouvèrnman i pèye in bann éspésyalis : sa i manyé konm dé shèf lo bann z’adisyon, soustrakssyon, poisantaz, zot i invnt ziska in bann koéfisyan, tousa pou dir aou kan la fini ranpli in paz ou la gingn kékshoz, sansa ou la pa pèrd konm ou i kroi. Parèye ké pou lo boulyé, ou i konpran pa bien, mé ou lé a d’mandé si la plime aou, konbien la plime aou, si la finn moi so kou isi i sava pa tonm pli bonèr ké d’abitid.

Mé akoz ou i sava pa anmèl sa avèk lo Sénégal ?

Mésyé l’ékoutèr nout radyo proféré, mi pans ou lé konm toulmoun é ou néna rézon d’ète an kolèr... Mé na in n’afèr mi konpran pa dann sak ou mèm l’apré di. Ou i roprosh gouvèrnman done in moné Lo Sénégal pou anpèsh in pé lo l’érozyon épi ou i di-éskiz amoin-ou néna arien a fout. Mésyé l’ékoutèr, ou i koné bien Sénégal i viv dann in rézime néo kolonyal é sak l’éta fransé i donn ali konm l’ède sé bann kapitalis fransé i tir la tar dsi pou grosi z’ot pla dann z’ot grann sisrfas. Sa sé in n’afèr toulmoun i koné é i diré ké ou ou i koné pa… Si i pous in pé lo boushon, ou lé pa tro loin pou dir i tir dsi ou pou donnn bann z’afrikin mé ou la tor : i tir dsi ou, sa lé vré, mé pou ranpli lo pla bann kapitalis. I fo apèl in sha in sha, in bézèr d’paké in bézèr d’paké, é in béèr d’zèf o la, in bézèr d’zèf o la.

Justin