Zot i koné parti kominis la fé, dann in pti liv, vinn-sinq propozisyon pou nout péi épi son popilasyon é bann poin-la mi pans sé lé plis ké inportan pou nout l’avnir, isi mèm dann loséan indien. Yèr nou la koz ansanm dsi lotonomi énèrzétik ; avan yèr lété la sékirité alimantèr : dé bon propozisyon pars san sa, nou in il dann loséan indien mi oi pa koman ni débrouyré nout kari-nout kari dsu d’ri é a nout kari sou d’ri-la pal o mèm zafèr.

Dé z’ot poin sé lé dé gran sèrvis : sèrvis pou la solidarité rant zénérasyon épi sèrvis l’anvironeman. Dann lo promyé sèrvis, konm zot i koné, nora plisanplis bézoinn d’moun pou travaye pars inn la popilasyon i viéyi, dé néna plis an plis demoun dann nout péi é si ni vé in sosyété imène bien roganizé, avèk in bon l’antant rant zénérasyon i fo ni pass par la. Pa nou tousèl, mi rasir azot mé in pé tout péi di mond é konm ni oi nout péi konm in laboratoir ébin i fo ni mète sa a l’étid-al’étid ? Pa solman, mé sirtou an aplikasyon.
Kan i di sa, désèrtin i di : « ésui la fèss vyé moun » ? Sa la pa in déstin pou moin, sa la pa in l’avnir ! Mé pèrsone i réponn pa : la pa solman pou sa ! Mèm si ède demoun fé zot toilète sé in n’afèr i kont dann la vi d’moun, dann z’ot konfor sirtou pou d’moun la fine fatigé. Mé néna d’ot shoz i kont galman dann bann métyé-la konm par ébzanp zoué in rol pou lo pasaz la kiltir : in rol pou zoué si in pèp i vé rèss in pèp épi gardien son kiltir épi son tradisyon, sak i fé ké li sé in pèp é pa solman in ta d’moun groupé dann in péi.

Dézyèm sèrvis é oplis i sava, oplis li lé nésésèr : sé lo gran sèrvis l’anvironeman. Sirtou dann in tan l’anvironeman lé ménasé konm zordi. Péi lé pti dakor, mé néna pou fé. Néna la propté pou amenn in pé partou omoins demoun i san azot bien dopi bord mèr ziska bann montagn épi bann rivyèr. Pars si i fé pa sa, la maladi v’ariv o galo. Zot i konpran bien l’anvironeman la pa solman in sèrvis léspas vèr : koup zèrb dakor mé pa solman pars si ni vé lo péi i kontinyé ète zoli nou lé blijé fé pliské sa. Zot i koné néna désèrtin péi konm Ruanda-in péi martir néna kkék z’ané sa lé konsidéré konm péi lo pli prop néna dann !’afrik. Dann l’érop galman néna bann péi prop é ni pé kant mèm pa rèss an aryèr apré kriyé : « Bann koshon ! Bann koshon ! » san fé sak i fo pou in bon l’anvironeman.
Nou v’arète la pou zordi, mé ni konpran bien sa bann sèrvis lé sèryé pou done travaye demoun, pou in sosyété a vizaz imin, é pou in alanvironeman soigné konm li doizète soigné.