Matante Zélida la ékrir Justin :
Mon shèr nové, mon spès salté,
I sort ariv amoin in n’afèr-la, sa lé inkroiyab. Mi domann amoin si la pa zot, bann rouj de fon, la zoué amoin in tourd’koshon konmsa... Figuir aou, moin l’ashète inn-dé laparèy moin lavé bézoin, vik sak moin l’avé té fine réformé : in pti téléfone, in marmite shinoi, in four k’i fé dézord sak i apèl mikro-onde... Pa bézoin mi pran la pènn dir aou kossa moin la fé avèk sak i marsh pi : moin la foute a la poubèl ! Ou i koné kossa l’arivé ? So léspès ti ra d’zanfan kouzine Rita la armènn tout pou moin épi la di amoin : « Matante, arpran sa épi ramènn magazin ! Vik na poin lo droi mète sa dann poubèl ». Moin noré touf sa !

Justin la fé aèl pou répons :
Matante, kroi amoin, kouzin Roné, sé in bon marmay, épi li lé dann la polis minisipal. Si li la di aou sa, lé vré pou vréman. Matante, sak ou la jété, sé in poizon pou la tèr : la-dan nana tout sort métal i prépar sèrkèy pou l’imanité. Sé pou sa gouvèrnman - in gouvèrnman la droite matante... mèm bann ké ou, la pran désizion-la. In bon désizion, sé in bon désizion, matante ! An plis, ou i pèy in taks pou bann vandèr magazin out bann mashine sak lé pi bon. Alor, ou i rann azot. Provik zot i fé sak i fo pou rosik lo bann laparèy.

I fo ni lèss pou nout zanfan, pti zanfan, arièr, épi arièr-arièr in tèr prop. Alon arète anpoizone la tèr !

Justin