Larlik sù lariaj. Otroman di, problèm an séri, ki frèn lavansman dan la vi. Lavnir lé pa sùr pou toulmonn. Alala shomaj, alala lojman, faktùr aou, parkoté pétrol lé plù shèr. Oui, sa mèm, larlik sù lariaj pou vienbou tienbo kap. É la pa tout i gingn suiv le mouvman. Larjan la poin le mèm valèr, fonksion ou lé shomèr, ousansa franksionèr.

La Frans la bien konpri isi la vi lé shèr. Soman-là, i done poursantaj vi-shèr, sak nana gro larjan. Amoin Zistin, mi di : "la vi lé shèr pou toulmonn. Somanké plùss ankor pou sak lé an ba léshèl sosial. Bann shomèr anparmi". Mi antan dir na in boug, Ratenon, i demann fénésansaj in Lobsèrvatoir bann pri èk revnu, konm la loi d’orientasion i prévoi. Lir aou lartik soisant-kinz loi-là.

Ala le larlik, ala le lariaj. Léta lù mèm i respèk pa sak lù la désidé. La di léro i rann anou plù for. M’a dir plùto na kome in gran mavouz sù lavnir i propoz anou èk moné-là. Na in poundiak demoun la po gingn koudkongn. Mé i prétan dir la vi lé pa shèr pou zot. Sré tan i démavouz tousa. Rogomant salèr-là, ousansa bèss bann pri-là. Antouka, fé in ka èk tousa.

Zistin