Mézami, pou La Rényon tazantan i fé in bilan : mi rapèl dsu la finission lo manda Nicolas Sarkozy la fé in zétazénéro épi lo Prézidan la fé in gran diskour laba dann Paris mé konm Sarkozy la pa gingn son ronouvèlman d’bail, l’arète la même. Apré li la vni Hollande é li la fé in kinkéna mi-fig, mi-rézin, ka-in ka-a. Sak la vni apré l’avé si tèlman konfyanss dann sak lété i vien avan li, ké li la rofé in léspèss l’audite intèrne épi konm i di son politik la parti a volo. A volo, mé la pa anpèsh bande fransé ronouvèl son bail.

Antouléka, shak foi k’in Prézidan sansa in gouvèrnman la di li fé lo bilan, noute parti la touzour fé konète son l’opinyon dsu noute sityassion, épi bande solission li propoze. Domaze lé z’ot la pa fé konm nou pars nou nora gingn konpar la pozission lé z’inn é sète lé z’ote, é apréssa nou nora mète dakor dsi in bon politik pou noute péi…

A ! Biensir bande média i fé konmsi né égziss pa. Konmsi noute lopinyon i konte pou la po d’patate mé sa i dispans pa lé zot de fé in bilan pou bien konète oussa ni lé, oussa ni doi alé, kèl sé noute bann poin for pi noute bande poin fèb. Pou nou ossi lé l’èr pou fé lo bilan é ni poura pa fé lontan konmsi de rien n’été.

A fors alé a lo, kalbass i kass. A bon ékoutèr salu.

Justin