So foi issi la rédaksion noute zoinal i propoz sak i yèm lir dann kréol rényoné in liv, lo tite, sé zistoir Tikok. Christian Fontaine la ékri bann zistoir-la é sa la pass an fèyton dann in zoinal téi apèl Temoignages chrétien de La Réunion. Apré son déssé plizyèr kamarade la ropran son bann tèks épi la rogroupe dann in liv.

Lintéré ? Mi oi dabor lo stil lotèr vréman gayar. Mi oi galman sa konm in témoignage kélk’in lété marmaye dann bann zané 1960 dann sid épi dan lé-o La Rényon in lintéré istorik sirésèrtin. Arzoute èk sa sé kélk’in, in prète katolik, bite an blan la pran parti pou son pèp é sirtou pou bann tikolon.

Dsi la kouvèrtir déyèr mi rolèv troi kozman :

Sète Axel Gauvin k’i di : « In zour va vnir, demoune La Rényon va konète par kèr toute bann zistoir Tikok » é sa sé in kékshoz ni souète pou vréman.

Néna galman lo komantèr Angélique Gigan k’i di : « un monument de la littérature réunionnaise » donk in sédèv é mi oi sa konmsa ossi.

Pou Jean-loup Gaillard : « Bann zistoir-la i fé parti lo patrimoine kiltirèl rényoné » an franssé mé-sé Justin k’la mète an kréol.

Ni oi galman liv-la la gingn lo pri Joseph Hubert 2011 la komine Sin-Zozèf.

Mi arète la, pa par anvi pars noré dé shoz a dir dsi liv-la, mé lé pa nésséssèr mi di pars mi koné zot i sava lir sa épi konstate konm mwin liv-la sé in sédèv pou vréman avèk in rogré Christian Fontaine la parti tro vite é konbien sédèv la rèst dan li olèrk li néna lo tan pou partaz sa avèk nou.

Témoignages i romèrssyé toute sak par ki bann zistoir Christian Fontaine va pass zénérassion an zénérassion : mi panss Reynolds Michel, mi panss Axel Gauvin, mi panss lantouraz Témoignages Chrétien La Rényon, mi panss bann déssinatèr konm Géno, Georget Bruneau épi Alix Pothin... Ni sava pa po linstan roproduir zot déssin mé sak v’ashète lo liv, sansa va lir sa dann bibliotèk zot va oir zot nora dann la min lilistrassion vivante noute péi La Rényon.

Astèr mi arète mayé, mi invite azot suiv Tikok dann toute son batkaré é mi invite azot lir bann zistoir-la lo mèrkrodi épi lo samdi é mi di avèk zot : opliss zot va lir, opliss zot va trouv gayar si tan tèlman Tikok i inkarn noute zénèss dopi bann zané soissante a monté.

A bon antandèr, salu !

Justin