Noèl la fini, zour d’l’an i vien déyèr. La boutik nana manzé an gaspiy, sirtou manzé imité : somon, boudin blan, tousala. Tanmié, sa i donn domoun travay, épi travay kalifié an plis. Sa bann métié i fo aprann, i fo an aoir lo gou pou fèr. Domaz nana domoun na poin larzan an süfizans pou ashté:in pti salèr i süfi pa pou manz zafèr konm sa.

Pou mon par, moin na konm in rogré : rogré aoir mépriz manzé mon péi pou manz manzé déor. Rogré mon léstoma, i donn amoin koudpié, pou di amoin li lé pa fé pou sa. Rogré mon gou i di amoin : lo gou lomoun sé sak li énèt épi li grandi avèk. Rogré, dann mon tèt i arvien lo modékri Sully Andoche i di konmsa :"méyèr manzé, sa manzé momon" Ala, mi aprann Jean Pierre Kof la prézant dann lémision Michel Drucker avèk in madam mi koné pi lo nom* koman i fé paté kréol. Moin lé kontan, moin lé fièr, moin lé bon pou bat sï mon léstoma. Soman traka i trap amoin toutsuit : mazine in pé, dann dé-troi z’an paté kréol i mark sa dann gran liv la kizine fransèz, akoz in moun déor malis la pran sa pou li ? Nout figir va asiz, Nou sar konm do moun volèr la pas son kaz anparmi lo bann zafèr volé navé bijou son vié famiy la donn ali sï son li d’mor. Sa in rashkèr, sa ! la pa vré ?
Oté dalon ! ou ki vanz pou nout kïltïr, oubli pa manzé La rénion. Sa sé lo patrimoine galman sa ! Sansa nou sar konm filao Sinzil, son rasine la fine dékrosh avèk la tèr, son pti pat tort i ansèrv pï arien. La pa lèr pou ral lo kèr ! Zis lèr pou dir konm bann moun nana lonèkté : "Alon fèr !"**

Justin

*mi an souvien pï son nom mé solman moin lé kontan pou èl.
**invitation à prendre le repas en commun.