Mi rapèl kan Paul Vergès la vnu mèr lo Por landroi-la lété sèk i falé oir koman : ni pé di léskine avèk zèrb Sin-Pol lété lo dé prinsipal plantassyon mé ni koné galman noute kamarade l’avé in vré ladmirassion pou bande pyé d’boi si tèlman ké son lékip la fé plante par-la 500000 pyé d’boi dann domène kominal.

Parèye kan la fé la route tamarin la fé plante ankor sin san mil pyé d’boi in pé toute kalité. Antouléka in plantassion bien divèrsifyé tèl fasson k’in zour la route-la va pass dann in foré... Mi koné pa lo bilan, pars gramoune la fine alé é sak la vnu apré lu, l’avé poin konm li in vénérassion pou bande pyé d’boi.

Na poin lontan nou la antande l’avé in projé pou plante in million d’pyé d’boi é si i ariv a fèr sar vréman kékshoz de bien pou nou.

D’issi d’laba ni antande l’apré ronouvèl bande plantassion kissoi dann in foré sèk, kissoi ankor boi d’koulèr épi d’ote kalité pyé d’boi. Ni koné galman l’ONF la fé plante in paké kriptomérya ; ni koné galman néna plizanpliss tamarin dé o.

Lé vré nou la si tèlman détrui noute foré d’orizine ké nou la bien bézoin in roplantassyon an gran dann toute landroi ni pé rofé pouss la foré. La pa pars nou lé konte l’agrikiltir mé pars ni koné noute klima pou li amélyoré ; lo kaptaj bande gaz avèk l’éfé d’sèr épi d’ote kalité plantassyon lé bien nésséssèr pou nou de rofé noute kouvèr forèstyé.

Mé antanssyon rofé la foré la pa rienk in n’afèr bande proféssyonèl, mé in lakt militan pou bande jenn épi la popilassyon an zénéral... Lé vré la foré sa i pouss pa an dé zour, é sé in travaye i pran lo tan, mé la pa pars li pran lo tan ké ni doi pa komanss ali a-fon. Mé sré plito pa mal ké ni roshèrch landroi ni pé in foré nourissyèr pou noute popilassion ;

A bon ékoutèr, salu !

Justin