Mi vé anparl azot lo mèrl blan pou komanssé. Sirésèrtin néna in bonpé d’moune va dir amwin : Mèrl blan ?sa i égziss pa in n’afètr konmsa. Out koko lé piké ou kwa ? Poitan zot i koné zoizo tuit-tuit — coracina newtoni-Sa mèm ni apèl mèrl blan issi La Rényon é sa lé dann danzé par rapor bann ra épi bann shat maron… Antansion, i fo pa konfonn avèk bann mèrl normal mé l o pigmantassion la fine pass in pé.

Astèr mi arète tèrla pou dir azot si mi paryé in mèrl blan dabor in pé va di sé in fo paryaz épi d’ote va dir sé in lésploi inpossib… In lésploi inpossib ? Sa i égziss sa ! In zour néna in ga la di avèk son bann kamarad li sava marsh dsi dlo.li poz in pyé épi li lèv pou poz l’ote avan lo promyé i anfonss.A ouète ! Ou lé fine ariv o fon avan konte ziska troi.

Néna d’ote paryaz lé pli danzéré ankor konm sak bann jenn jan Boi — d’nèf téi paryé konm boir in lite ronm san arété.A pa fèr sa sirtou pars a la fin wi touf. Mèm pou in mèrl blan i fo pa tante in n’afèr konmsa.

Alé mi panss zot lé dakor avèk mwin in mèrl blan sa i égziss. Mi panss galman lé pa inpossib fèr in lésploi si ou lé bien préparé, é si ou lé bien doté par la nati épi la téknik..

Alé ! Mi kite azot rofléshir la dsi é ni retrouv pli dvan, sipétadyé.

Justin