Zordi mézami, mi invite azot pike in tète dann bassin la kiltir rényonèze é rante dann limèrsion dann kultur-la. Mi invite azot pou in partaz kiltirèl rényoné, konm in voiyaz vital dann la kulture noute péi avèk o boute shomin lo santiman d’ète ankor plu rényoné, épi fèr ankor pliss parti noute nassion rényoné. Par la kultur biensir, é par l’imèrsion dann kultur-la.

Mwin la pass pliss douzan pou amontre bande jenn zétidyan la lang épi la kultur rényonèze é toultan mwin té i mète azot an garde, zot amérikin, zot alman, zot franssé, zot rényoné, épi ankor in ta nassionalié. Mwin téi di azot souvan défoi, zot i pé si zot i vé aprande bande téknik la lang, lo vokabilère, la gramèr, la konzigézon bande vèrbe mé toussala va sèrv arien si zot i rante pa an partaze avèk la kultur rényonèze.

Mwin té i di azot : lékol mwin l’aprande fransé, mwin l’aprande ossi la litératur La frans, épi mwin la rante in pé dann la kutur fransèz é si fransh vérité, zordi ankor, mi pé pa rovandike amwin konm franssé mé pars mwin la partaze avèk banna in pé zot kultur, mi panss mi gingn koze in pé franssé épi konprande sak bande fransé i di. La pa lo ka pou langlé, sinploman pars mwin la pa gingn partaze zot kultur é toute mon tantativ la pa réissi. Poitan mwin la kass mon koko pou aprande lang-la, mé la pa ansèrv de rien…

Mézami zot i koné l’om néna plizyèr dimansion, inn lé ékonomik, l’ote lé sossyal, l’ot ankor anvironemantal, mé la dimansion kulturèl sa sé in dimansion kapital é pou dire azot la vérité, mi pans sa lé fondamantal. L’om lé kulturel sansa li lé pa. Mézami alon noute toute ansanb pike in tète dann bassin la kultur rényonèze pars pou mwin sé lo méyèr landroi ni pé rotrouv anou.

A bon ékoutèr, salu !

Justin