Lakey lo sit > Chroniques > Oté
Alon planté mézami ! Ni gingn pa don nou ?
lindi 23 out 2021, sanm
Somenn i sorte passé mwin la antande in roportaz la intérèss amwin mèm si mi rapèl pi koman banna la apèl sa dann télé. Antouléka lété i porte dsi dori ni pouré ariv a manké, é si ni anmank pa lo pri lé riskab grinpé Mézami, ménass konmsa nou lé koutimyé di fète.
In tan l’avé ariv in mank do ri basmati pars gouvèrnman indien la désside arète lésportassyon produi-la vi ké bande zisdien zot mèm l’avé bézoin zot nouritir. Aprésa la débloké, é mi rapèl pi, komann sa l’arivé. In n’ote zour lété bande shinoi l’otèr. I rakonte konmsa komité santral parti kominis shinoi la done in l’orde toute bande gro sosyété téi i komèrs lo ri épi la di azot ashté toute sak zot i gingn pars i fo goumante bande rézèrv. La nuite mèm, bande shinoi l’ashète toute sak lé disponib konm ri dossi lo marshé… Anfin, i prétan.
Astèr mi rapèl in zistoire dori mangalor. Sa téi éspass dann mon zénèss. Dori téi manke é in zour in bato dori mangalor l’arivé : in joli koulèr jone, in bon randman, mé in l’odèr insiportab in foi kui, téi port pliss dsi lodèr la taye shate ké lodèr d’ri pou vréman. Mi rapèl in zour gro Gaby té apré raonté, li la fé kui sa pou son shate é lo shate la pa manzé, mé la parti maron é li artrouv pi lo mimite. Vré, Fake, Mi koné pa tro.
Mi di azot sa pou fé rire la boush mé si zot i rogarde in pé laktyalité bande péi loséan indien, zot va rande azot konte souvan dé foi néna moune i manke dori... Nou ni panss nou lé a l’abri, mé konte dossi é fyé pa tro, néna in zour i apèl doman. Alor, kèl solission ? Alon plante dori épi pa solman, d’ote séréal galman pou noute lotosifizanss.
