Yèr zédi, dann zoinal Témoignaz, nou la diskite in pé dsi kozman in sèrtène ékrivène la di dann lo lémisyon « nou lé pankor koushé ». Konm listorien Prosper Eve la di dann lo lémisyon radio rényon la promyèr, plito ké koz la boush rouvèr « i vo myé tourn sète foi son lang dann son boush » é mi pans mésyé-la néna rézon é san foi rézon. Mi diré mèm kan ou i koné pa kékshoz ou i fèrm out také é demoun i pé kroir ou lé in pé kouyon plito ké rouvèr out boush é donn la prèv ou lé kouyon pou d’bon. Sé lo ka lo lékrivène Christine Ango dsi la késtyonn lésklavaz.

Pou sak i rapèl pi lo madam Ango l’avé konpar lésklavaz avèk lo gran malèr bann juif la konète dann la péryod dézyèm guèr mondyal. Dizon la fason èl la di sak èl la di lété konmsi èl té apré di lo sor bann zésklav-viktime in krime kont l’imanité - lété pa si mové ké sa par raport sak bann juif la sibi.. Final de kont, èl la fé konmsi èl téi rogrète bann télééspéktatèr l’avé pa bien konprann aèl. Dizon, manyèr èl la fé son soidizan zéskiz, èl téi vé dir demoun la pa bien ékout sak èl la di, épi zot la pa bien konprann son kozman. Kan in moun i ariv in nivo konmsa, sèl zafèr i fo rapèl aèl sé d’alé vann la sann par pint sansa olèrk zoué avèk bann mo, èl l’avé myé pou fèr an zouan avèk dé pti boi dan la t.…

A bien kalkilé, mi pans désèrtin moun i doi zète bien éré madam Ango i gingn dsi lé doi plito ké zot. Kèl z’ot ? Tout sak i tap dsi lo bann zidé nout parti kominis i arète pa défann dsi la késtyon n lésklavaz. Bann moun mi pans zot i pé z’ète kalifyé de révizyonis éré. Par égzanp tout sak la mont dsi nout lanp kan la réjyon té i vé konstrui la MCUR. Zot i pé pa z’éte konsidéré konm ignoran pars lété in bann istorien, mé zot téi trafik la vérité. Si zot la pa di sak madam Ango la di, la pa jène azot dann tan pou pinn la vérité avèk la pintir révizyonis.

Inn-dé pti rapèl é pétète nou va rokomans in polémik bien itil pou fé sort la vérité dann fénoir : kisa téi vé ranplas lo vin désanm par la fète létchi néna in bon koup de tan ? Kisa la rokouv nout vin désanm par lo zour bienéré pèr scubillion ? Kisa té i di souvan dé foi madam Desbassyn lété inn bone fam ? Kisa la di ép i la ékri parl lésklavaz é son labolisyon sé mète dézord dann la sosyété rényonèz ? Kisa la di lésklavaz dann nout péi lété moin kriyèl é pli dou ké dann d’ot péi ? Zordi ni pé razout manzé bann zésklav lété bon, ézot lété bien korporé ?… Mi di sa zis pou armète inn koush dsi modékri moin la fé épi la pass dann Témoignaz zédi 6 moi d’zyin 2019.