An parmi bann péi i ansèrv moné-la néna 8 péi fé parti l’UEMOA (Lo bénin, lo Burkina faso, la Cote d’ivoire, lo Mali, lo Niger, lo Sénégal, lo Tchad, la GuinéeBissau), 6 péi La CEMAC (Lo Cameroun, lo Centre afrik, lo Congo, lo Gabon, Guiné ékwatorial, Tchad). Dann mon téléfone banna i parl pa la Républik Comores mé li ossi lé ladan d’apré sak mi kroi.

Shak péi néna son bann pyèss épi son bann biyé mé tout lé pa parèye é pou fé komèrs lé z’inn avèk lé z’ot i fo pass par La franss. Astèr sé laba dann La franss i inprime lo bann biyé lé z’inn é lé z’ot. Sa i éspass dann la vil Chamalières é sak i komann sé la bank de Franss. Sé dir zot dégré lindépandanss.

An pliss ké sa néna in kont éspéssyal dann Trézor piblik franssé. Kossa i ansèrv ? I ansèrv pou ramass in pé lo bann zavoir bann péi la zone CFA é néna arienk gouvèrnman franssé i koné kossa néna konm larzan dsi lo kont la. Bann péi la zone CFA na pwin lo droi konète kossa néna dsi lo kont.

In lavantaz é in linkonvényan : La franss i garanti la stabilité lo bann moné mé bann péi i gingn pa zoué lo oss-bèss pou dévlop lékonomi. Biensir néna pwin in dévaluassion possib, mé la moné i sèrv pa non pli konm sipor lékonomi.

Donk si zot i oi bien bann péi lé indépandan mé késtyonn moné zot lé pa indépandan mèm si lo prézidan Macron la fé in pa anavan dann la dirékssion lindépandanss bann moné mé in pa tro timid pou pèrmète bann péi la zone CFA libèr azot ékonomikman. Mi arzout : okin déssizyon monétèr san lakor La franss.

A bon antandèr salu !

Justin