Mézami yèr é mèm avan-yèr, mwin la rogarde la télé La Rényon, épi la télé Moris é mèm la télé laba dan La Franss. Mwin la ékoute ossi plizyèr radio é mwin la romarke laktyalité pou d’moune lété sa : lo siklone, épi son konsékanss, épi koman kan demoune lé dann la frazilité, in lévènman konmsa i rann azot ankor pli frazil. Lé normal, é lé touzour konmsa, kan in gran parti d’noute popilassion néna la vi dir.

Astèr sak lé sir sé k’ni sava oir débarke bann minist vi ké nou lé pa mète de nou, é bann minisss lé paré pou sote dsi in kékshoz spéktakilèr, pou fé romarke azot par d’moune zot péi, konm pou di La Franss lé grande é zénérèz é èl i pran lo soin pou bann moune l’outremèr.

Défoi mi san amwin konm abèssé par in konportman konmsa. Mi rogrète i tienbo pa konte sak ni propoz, dopi lontan. La natir ok sé la natir, mési ni sava rode dann diskour Paul Vergès, osinonsa dann Témoignages, ni romarke dopi lontan ni domann k’i fé atanssion sak i fé issi La Rényon, é sirtou ni di : prévnir sé guérir, é pou prévnir i fo ni porte atanssion toute sak i fé issi é an partikilyé kan i fé pa in konte avèk bann bon propozission.

Mi yèmré pa ké zordi bann gouvèrnman i débarke avèk bann boutèye dolo an kado, in moné, osinonsa la promèss déklarassion d’katastrof natirèl pou démontré. Mme La Maire d’Sind-Ni téi déklar yèr matin : « i fodré pa, apré in déga médiatikman kouvèr konmsa i fo ankor domann anou aporte la prèv nou lé dann in katastrof natirèl alé oir nou lé d’dan ziska lo kou ». Nou va oir si gouvèrnman la ékoute aèl mé sanm pou mwin la birokrassi sa lé tro bien instalé issi La Rényon, pou éspèr avoir in réakssion normal, in réakssion demounenormal. Anfin ki vivra verra !

A bon antandèr salu !

Justin