Dopi kékzour lo prézidan La frans épi lo promyé minis shèf gouv èrnman, l’apré zoué zé-la… Inn i di promyé out va arkomans mète lo mask, l’ot i di ébin lindi 20 va arkomans mète lo mask dann landroi fèrmé. Kan inn i di, i sava rouv la diskisyon dsi la rotrète, l’ot i di finn l’ané va oir sa. Anplis tousala i di an piblik, dann bann télé é tout demoun i koné sa, tout demoun i antan sa.

Mé zami sanm pou moin sa sé in késhoz i pé pa diré. Afors friksyone inn a l’ot, moin lé sir sa sé in n’afèr i sava pa dir lontan. Pé sfèr, konm i di, inn i vé pran la plass vizir konm dann bann désiné l’avé in sèrtin IZnogoud. Zot i pans pa afors inn i ronz son frin, v’ariv lo tan inn é l’ot va shoké ?

Pou moin sa sé in n’afèr i fé pa moin arien, é konm zot lé rantre zot, moin pèrsonèl, moin lé pa la avèk sa. Solman mi koné bann provèrb kréol rényoné é sirtou inn mi romark sète la touzour di la vérité é provèrb-la i di : Afors alé a lo kalbass i kass… Don k nou va gété pou oir l’èr kalbass va kassé é zour-la, mi pans nou va bate la min.

Bate la min ? Bin oui pars zot i koné banna é nou, nou lé pa dann mèm kan. Volèr i vol volèr, lo dyab i ri é sa sé in règ lé valab san pour san. Dann la politik, konm dan tout zafèr. Lé vré sa i éspass dan La frans, mèm dann Paris, alor dizon, alon pa mète nout kiyèr dann kari i kui pa pou nou. Sinploman alon aspéré pou oir sak v’arivé é alon sinploman shof nout min pou bien aplodi.